Asturies Ganadera critica l'actitú «opresora» de Delia Losa que-yos prohibe manifestase n'Aristébanu
ACTUALIDÁ
Aseguren que Delegación de Gobiernu utiliza argumentos risibles pa torgar manifestase
29 jul 2022 . Actualizado a las 17:09 h.La organización Asturies Ganadera criticó esti vienres a la delegada del Gobiernu, Delia Losa, a la qu'acusó d'amosar una «actitú opresora y métodos franquistes» al prohibi-yos manifestase esti domingu na Braña d'Aristébanu, onde se celebra la fiesta Vaqueira y va apurrise al presidente Adrián Barbón, la distinción de 'Vaqueiru d'Honor'. Aseguren que Delegación de Gobiernu utiliza argumentos risibles pa torgar manifestase.
El voceru de la organización, Xuan Valladares, consideró «indignante esta distinción que va recibir Barbón cuando la situación del campu ye estrema», y llamentó que dende'l Gobiernu «non yá nun se dignen a escucha-yos, sinón qu'inclusive torga-yos movilizase na cai».
Considera'l colectivu que tán sufriendo un «verdaderu acosu per parte del partíu de los ERE, los casos Marea o los indultos a los que roben el dineru de los ciudadanos, que tán exerciendo un verdaderu abusu de poder».
«Los motivos que nos dan son de risa. Argumenten con verdaderes perlles como que nun esclariamos el númberu d'asistentes. Primero dícennos que nun apurrimos el llugar y hora concreta y depués coles mesmes dícennos que la hora y el llugar qu'apurrimos coincide cola celebración d'otru eventu», manifestó Valladares.
Critiquen amás que les actuaciones folclóriques d'Adrián Barbón «más propies de los tiempos de la Sección Femenina y de la tonadilla d'Isabel Pantoja, Lola Flores o Carmen Sevilla nun sirven nada al mediu rural» y por ello consideren «indignante que por politiqueos d'intereses d'organizaciones que son chiringos vaya premiase con esta distinción de Vaqueiru d'Honor a un señor que nun fai más qu'entorpecer».
Alvierte la organización que van siguir amosando'l so malestar na cai y van movilizase en futuros eventos como'l del Sueve.