Visita Xixón realizó la evaluación cola téunica de veceru misteriosu
29 dic 2022 . Actualizado a las 13:01 h.La hospitalidá, tal como destaca la campaña de promoción Xixonomía, sobresal como puntu fuerte ente les empreses y servicios turísticos de Xixón. Asina asoléyase nes evaluaciones de veceru misteriosu, realizaes a más de la metada de les 121 empreses y servicios turísticos comprometíos col programa de Calidá en Destín (SICTED), que tien como envís facer de Xixón un destín turísticu competitivu. La valoración global media algamada anguaño asítiase en notable.
Cadañu, un veceru anónimu visita los hoteles, restoranes, sidreríes, comercios, museos y otres actividaes qu’atienden a los turistes de Xixón y detecta los puntos fuertes y les oportunidaes d’ameyoramientu nes instalaciones y nel serviciu ufríu por cada negociu.
No tocante a la información previa facilitada al veceru, valórense los canales pa llegar al turista: páxina web, redes sociales, xeolocalización y posicionamientu, atención telefónica y reserva. De toes elles, destaca la disponibilidá de web, con posibilidá de xestionar la reserva, especialmente n’agospios y, cada vez más frecuente, nel restu d’actividaes. En contraposición, la xestión de la reputación online, l’actualización periódica de los canales de comunicación y, en concreto, de les redes sociales son los aspeutos onde s’algamen notes más baxes.
Respeuto al serviciu, el puntu fuerte ye’l xeitu del personal y l’atención al veceru, lo que refuercia la hospitalidá del destín. Nel llau opuestu, como oportunidaes d’ameyoramientu, ta la posibilidá de conocer la satisfaición del visitante y de poner a la so disposición más y meyor información, tanto de los servicios del establecimientu como sobre’l destín, cuestión que s’agravó tres l’andanciu.
En rellación coles instalaciones, l’aspeutu que más destaca ye la identificación corporativa y la señalización clara y visible de los establecimientos. Pol contrariu, l’aspeutu más feble ye dafechu l’estáu y llimpieza de los baños, anque la valoración media d’esti requisitu nun desciende de los 6,3 puntos sobre 10, algamando l’aprobáu.
El Sistema Integral de Calidá Turística en Destín (SICTED) ye un programa d’ameyoramientu de los destinos turísticos entamáu pola Secretaría d’Estáu de Turismu (SET) y xestionáu en destín por Visita Xixón. Trabaya con empreses/servicios turísticos de 37 oficios col envís últimu d’ameyorar la esperiencia y satisfaición del turista.