Una investigación n'asturianu cuélase ente les cinco del CSIC más lleíes na plataforma Researchgate
CON C DE CIENCIA Y CULTURA
Les otres cuatro publicaciones tán escrites n'inglés
09 oct 2019 . Actualizado a las 09:27 h.L'usu del asturianu sigue xenerando polémica en determinaos sectores de la sociedá, pero'l so usu cada vez ta más estendíu. Un exemplu ye l'artículu «Nes llendes l'aldea: Paisaxe y territoriu en Vigaña (Miranda)», del equipu de la profesora de la Universidá d'Uviéu Margarita Fernández Mier, que ta ente les cinco publicaciones del CSIC más lleíes na plataforma Researchgate, una de les webs académiques más importes d'ente toles usaes polos profesores universitarios.
D'esta forma, esta selmana, nel top 5 de publicaciones del CSIC en Researchagate entra una investigación escrita n'asturianu. Les otres cuatro más lleíes tán escrites n'inglés y tienen más que ver coles ciencies naturales. «Esti artículu demuestra que, si'l tema ye d'interés, la llingua asturiana nun ye torga pa lleer estes publicaciones», afirmó Mier en declaraciones a Europa Press.
«Nes llendes l'aldea: Paisaxe y territoriu en Vigaña (Miranda)» ye una investigación coordinada pola doctora d'Historia y profesora del departamentu d'Historia de la Universidá d'Uviéu Margarita Fernández Mier. Nesti artículu tamién participaron David González Álvarez, César Martínez Gallardo, Pablo López Gómez y Candela Martínez Barrio.
La obra ta publicada dientro del octavu volume de la colección «Escavaciones arqueolóxiques n'Asturies», editada pol Gobiernu asturianu y que recueye los principales trabayos arqueolóxicos realizaos nel Principáu nos últimos años.