Entama'l festival Nel Amaro de teatru profesional en llingua asturiana

El vienres 1 d’ochobre va tener llugar la primer representación del V Festival Nel Amaro de Teatru Profesional en llingua asturiana. Nesti festival van representase les cuatro obres finalistes qu’opten al premiu del mesmu nome, escoyíes pol xuráu nuna primer fase celebrada nel mes de xunetu.

El premiu Nel Amaro ta convocáu pola Conseyería de Cultura, Política Llingüística y Turismo nel contextu de los premios lliterarios y artísticos en lengua asturiana o gallego-asturiano, y puen concurrir a él empreses del sector profesional dedicaes a la producción y representación d’espectáculos teatrales.

El xuráu, integráu por especialistes en teatru y llingua asturiana y presidíu pol director xeneral de Política Llingüística, Antón García, seleccionó nel so primer conceyu estos trabayos pa la so representación en el V Festival Nel Amaro nes feches que s’indiquen:

• Grana de cardamomu, d’El Callejón del Gato (1 d’ochobre)
• La reina de la guapura de Leenane, de Nun Tris Producciones (8 d’ochobre)
• Les piripiripirates con parches y a lo xole, de Factoría Norte (15 d’ochobre)
• Setiembre, d’Arte Producciones (22 d’octubre)

El Teatru Filarmónica d’Uviéu va acoyer les representaciones, qu’entamen a les 20.00 hores, con entrada llibre y gratuita hasta completar aforu.

El Premiu de Teatru Profesional Nel Amaro, dotáu con 6.000 euros, convócase col fin de consolidar, arriquecer y prestixar la llingua asturiana y el gallego-asturianu nel ámbitu del arte dramáticu. La pasada edición del gallardón tuvo como ganador al espéctaculu El viaxe de Covaletti, de la compañía Higiénico Papel.

El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n’asturianu. Nel Amaro foi amás l’autor al que se dedicó la edición de la Selmana de Lletres Asturianes en 2021.

---

---

---