La xornada d'actualización didáctica y pedagóxica va xirar alredor de les alfabetizaciones múltiples
25 abr 2017 . Actualizado a las 19:21 h.L'institutu de Riesgos Llaborales acoyerá esti miércoles 26 d'abril, en sesiones de mañana y tarde, la VII edición de la Sestaferia Educativa, una xornada d'actualización didáctica y pedagóxica que va xirar alredor de les alfabetizaciones múltiples. Depués de tres años, vuelve recuperase esti alcuentru de formación dirixíu al profesoráu de Llingua Asturiana y Lliteratura y Gallego-Asturianu. La Sestaferia ta entamada polos Centros del Profesoráu y Recursos d'Asturies y la Dirección Xeneral de Planificación Llingüística y Normalización.
Miguel Calvillo, asesor del Centru del Profesoráu de Córdoba, especialista en proyectos educativos, innovación educativa y proyectos llingüísticos de centru, va ser l'encargáu d'inaugurar les xornaes cola ponencia Las alfabetizaciones múltiples no pueden dividirse. Las alfabetizaciones múltiples en el proyecto lingüístico de centro. Adela Fernández y Irene González, asesores en Centros d'Innovación y Formación del Profesoráu dependientes del Gobiernu Vascu en Getxo y Zaratamo, respectivamente, van presentar l'enfoque didácticu nuevu qu'ufierten les alfabetizaciones múltiples al traviés de la ponencia Alfabetizaciones múltiples: algo más que palabras.
La xornada de mañana va completase con una partida d'esperiencies educatives presentaes por profesoráu de dellos centros educativos asturianos: José Luis Agüera Boves, del IES García de la Concha de Villaviciosa, va ser l'encargáu de presentar la esperiencia Sacando l'asturianu de la clas de Llingua Asturiana; Ana Isabel Medina Zarabozo y Isidoro Villa Costales, dambos profesores del CP Xentiquina, van ufiertar una visión sobre la situación del asturianu anguaño como llingua minorizada na enseñanza na esperiencia que lleva por títulu Aula y patiu n'asturianu; y Montserrat Blanco Fernández, maestra de Llingua Asturiana y Lliteratura nel CP Rei Pelayo de Xixón, va proponer l'usu de les tecnoloxíes nueves como mediu pal aprendimientu nel aula na so ponencia Les TIC na clas d'Asturianu.
La tarde va dar pasu a dellos talleres educativos onde docentes esperimentaos nos enfoques metodolóxicos y didácticos nuevos van ufiertar una visión completa del tratamientu del asturianu y gallego-asturianu nes aules. La organización de los talleres va dexar a tol profesoráu asistente participar en caún d'ellos, porque van desenvolvese de forma simultánea a lo llargo de la tarde. Los talleres van tratar dellos temes. Chelo Veiga García, encargada de la Biblioteca Sara Suárez Solís d'Uviéu, presenta'l taller Munchu ruíu, pero poques nueces: un taller d'ALFIN/AMI.
Alba Hernández Boada, maestra del C.P. Santa Eulalia d'Uxo, y Ana Isabel González Álvarez, del C.P. Benjamín Mateo de La Felguera, dirixen el taller Cooperativizando la llingua. M.ª Mercés Calzada Redondo, del IES Batán de Mieres del Camín; M.ª Ángeles García Rodríguez y María Cuervo Escribano, dambes del IES Víctor de la Concha de Villaviciosa; Xurde Fernández Fernández, del IES Candás, y Nuria Sánchez Rodríguez, del IES Padre Feijoo de Xixón, van presentar el taller Competencies clave nel aula de Llingua Asturiana. Pela so parte, Ricardo Saavedra Fernández-Combarro, del IES Carmen y Severo Ochoa (L.luarca), va conducir el taller Creación de cancióis en gallego-asturiano.
La xornada va zarrala l'escritor Milio'l del Nido, que, dende'l puntu de vista d'un narrador esternu, va presentar en clave lliteraria les conclusiones de la xornada.