La organización echa-y en cara que nun pronunciara neguna palabra n'asturianu nel mensaxe de fin d'añu
31 dic 2017 . Actualizado a las 12:06 h.La Xunta pola Defensa de la Llingua (XDLA) criticó que'l presidente d'Asturies, el socialista Javier Fernández, nun usara l'asturianu nel so discursu de fin d'añu. Amás, en referencia a les palabres del xefe del Executivu nes que señaló qu'Asturies va oponese a cualquier iniciativa que debilite «la garantía constitucional d'igualdá» ente territorios, l'asociación afirmó que pidir la oficialidá «ye pidir igualdá coles otres autonomíes del Estáu que tienen llingues propies».
Al traviés de dos mensaxes na so cuenta de twitter esti domingu, la XDLA posicionóse sobre'l mensaxe de fin de añu del presidente asturianu, onde nun pronunció nenguna palabra n'asturianu. Pa la organización, esto supón una aportunidá desaprovechada «un añu más» por Javier Fernández, al que tamién-y echen en cara que nun fixera nenguna referencia «a la solución del conflictu llingüísticu como un oxetivu pa la sociedá asturiana».
Per otru llau, el xefe del Executivu autonómicu señaló, en referencia al debate sobre la reforma de la financiación autonómica, que tolos españoles somos ciudadanos d'un mesmu país «y dicir ciudadanos ye dicir iguales, por eso defendemos que la prestación de los servicios tenga un nivel altu y sía similar nel conxuntu d'España», amás d'añadir qu'Asturies diba oponese a cualquier iniciativa que debilite la garantía constitucional d'igualdá ente territorios.
Unes palabres que-y valieron a la XDLA pa dici-y a Javier Fernández que la oficialidá ye'l «reconocimientu d'un derechu y la garantía de la llibertá d'elección de llingua». «Reivindicándola, tamos pidiendo igualdá coles otres comunidaes autónomes del Estáu que tienen llingues propies y sí la tienen reconocida nos sos estatutos d'autonomía», afirmó la organización al traviés de la so cuenta en twitter.