«Agora» y «Agora ye'l momentu», la banda sonora de la manifestación pola oficialidá

La marcha va tar amenizada por dos bandones de gaites, un grupu de pandereteres, una batucada y un soundsystem

Agora Videoclip creado por la Xunta pola Defensa de la Llingua Asturiana par ala manifestación del próximo 21 de abril

Redacción

Agora y Agora ye'l momentu son los cantares colos que la Xunta pola Defensa de la Llingua Asturiana (XDLA) quier llamar a la participación na manifestación pola oficialidá del 21 d'abril n'Uviéu. L'asociación indica que los músicos asturianos vuelven dar un pasunel so apoyu a la reivindicación llingüística «ayudando a promocionar la convocatoria, dando cuenta de la so importancia histórica y llamando a la sociedá asturiana» al traviés de los doscantares.

El primeru ta interpretáu por Vito Álvarez y Xune Elipe, con música de Sergio Rodríguez y lletra de Pablo Texón. Trátase d'un tema que tien una parte interpretada en gallego-asturianu. Pa la so difusión, Agora va tener un videoclip realizáu por Guillermu Fernandi que se va mover peles redes sociales. Nél, faise un percorríu pelos más de 40 años de reivindicación llingüística n'Asturies.

Per otru llau, nel ámbitu del folk muévese Agora ye'l momentu, con lletra y música de Xuacu Amieva, gaiteru fundamental na recuperación d'esti instrumentu n'Asturies y que collaboró nel discu «Santiago», del grupu irlandés The Chieftains, gallardonáu con un premiu Grammy.

«Son dos temes que se complementen», indiquen dende la XDLA, que señala qu'ún «ta interpretáu por una muyer, musicalmente más contemporaneu y que pue llegar a un públicu mui amplio», y otru «por un home, de calter más tradicional y que llega dende'l mundu del folk asturianu, como homenaxe a esti xéneru que llevó'l nome d'Asturies per tol Arcu Atlánticu».

Música na manifestación

Per otru llau, la manifestación del 21 d'abril va contar con animación musical a lo llargo del so percorríu. Asina, van participar dos bandones de gaites -una abriendo'l cortexu pola oficialidá-, «formaos por interpretes de la mayoría de bandes de gaites d'Asturies», indica la XDLA.

Otra manera, a lo llargo del percorríu tamién van acompañar «a los miles d'asturianos que se sumen a la manifestación» un grupu formáu por más d'un cientu de panderetes que van interpretar El ramu del Día de les Lletres, un cantar compuestu hai años pa manifestaciones anteriores con dalgunes cuartetes nueves, tanto n'asturianu como en gallego-asturianu, y que critica «l'usu amenorgáu del nuestru idioma dende las instituciones públiques».

P'acabar, la manifestación del 21 d'abril tamién va contar con una batucada y los sos característicos ritmos de percusión y samba, y un soundsystem, «qu'al meyor estilu xamaicanu va contar con una furgoneta que va acompañar el cortexu y que col so equipu de soníu va dir ambientando la manifestación con música».

«Y ye que la llucha pola oficialidá faise con allegría y esta ye la meyor manera de convertir el 21 d'abril na fiesta de la igualdá ente tolos asturianos», señala la XDLA. Per otru llau, desque acabe la manifestación, va facese un conciertu na Plaza de la Catedral onde van participar Toli Morilla (cantautor) y L-R (postfolk).

Valora este artículo

8 votos
Comentarios

«Agora» y «Agora ye'l momentu», la banda sonora de la manifestación pola oficialidá