El presidente de l'Academia de la Llingua afirma qu'Asturies ta «madura» pa una oficialidá «inevitable»

Europa Press OVIEDO

ASTURIAS

Academia de la Llingua
Academia de la Llingua

Xosé Antón González Riaño esplicó qu'esta tien que ponese en marcha ensin que «s'escluya a naide»

05 may 2018 . Actualizado a las 09:44 h.

El presidente de l'Academia de la Llingua Asturiana (ALLA), Xosé Antón González Riaño, afirmó qu'Asturies "ta agora madura" pa poner en marcha una oficialidá «inevitable» porque se dan «les condiciones d'alcuerdu social y políticu". Nesi sentíu, esplicó qu'esta tien que ponese en marcha ensin que «s'escluya a naide».

Asina lo señaló Riaño nel so primer discursu del Día de les Lletres Asturianes nel Teatru Campoamor, onde principió recordando que nesi escenariu dellos asistentes «xiblaron y espatuxaron con rabia» al sentir un curtiu mensaxe n'asturianu, polo que pidió un aplausu «como muestra de respetu y homenaxe» a les llingües d'Asturies y del mundu.

L'ALLA acoyó nesta sesión solemne a dos académiques correspondientes nueves, la historiadora Margarita Fernández Mier y la profesora de Ciencies de la Educación Isabel Hevia Artime, «dos muyeres asturianes d'un valir incuestionable».

Otra manera, Riaño repasó'l trabayu de l'Academia nel últimu añu, onde destacó, ente otros munchos, el III Estudiu Sociollingúísticu d'Asturies, de Francisco Llera Ramo, y el Diccionariu Etimolóxicu de la Llingua Asturiana, de Xosé Lluis García Arías, «obra que constitúi'l cumal de la filoloxía asturiana».

Per otru llau, reinvidicó la presencia d'informativos n'asturianu nos medios de comunicación públicos, dalgo pa lo qu'ufrió la collaboración de l'Academia «pa facer vidable esti decisivu apueste cultural p'Asturies».

El presidente de la institución entró nel debate sociopolíticu que vive Asturies sobre la oficialidá afirmando que tamos nuna "dómina decisiva" y que l'exemplu taba en que nunca se faló tanto d'ella «equí y en Madrid».

Asina, afirmó que «hai una clara conciencia qu'afita lo inevitable d'un procesu, previstu constitucionalmente, que va asitiar al asturianu al mesmo altor de dignidá que'l restu de les llingües españoles».

Nesi sentíu, indicó que los asturianos "nun somos más que naide, pero tampoco somos menos que los baleares, catalanes, gallegos, navarros, vascos y valencianos". «Somos asturianos y asturianes con derechos y con una cultura que queremos caltener», indicó Riaño, polo que se preguntó «por qué razón, ética o democrática habríemos renunciar a esi llogru social».

Asina, esplicó que la sociedá asturiana ta agora «madura» pa poner en práctica una oficialidá «afayada a les nuestres concretes necesidaes sociollingüístiques". Una oficialidá que pa Riaño ta "al algame de les manes», ye «inevitable» y «va llograse porque agora se dan les condiciones d'alcuerdu social y políticu pa facela vidable».

Una oficialidá basada nuna política llingüística que «nun escluya a naide y qu'implique "l'exerciciu de la llibertá llingüística, non de la imposición y que garantice les posibilidaes de sobrevivencia d'una vieya cultura europea que s'espresa al traviés d'una llingua milenaria como ye la nuestra».

Una situación qu'ha llograse, según el presidente de l'ALLA, intentando'l máximu consensu posible «porque la llingua nun ye de naide n'esclusiva, sinón de tol pueblu asturianu».

«Ye esti pueblu'l que tien qu'algamar que les instituciones polítiques s'apauten agora na busca de la oficialidá qu'Asturies necesita, pero cuntando tamién col sofitu y la implicación d'otros sectores sociales», indicó, p'añadir que tolos sectores tienen que collaborar pa esparder la idea «d'una xusticia llingüística espeyada al traviés de la oficialidá».

«Ye muncho lo que nos xugamos, tanto como la nuestra llingua: una herencia de sieglos tresmitida de madres a fíos como la mayor creación del alma d'Asturies», sentenció Riaño enantes de finar el so discursu con unos versos de Berto García y el tradicional 'Puxa Asturies'.