Lluis Aique Iglesias gana'l Premiu María Josefa Canellada de Lliteratura Infantil y Xuvenil

L'escritor y la obra «Invisible» resultaron ganadores de la décimoprimer edición del Premiu en llingua asturiana, que concede la Conseyería d'Educación y Cultura.

Libros
Libros

Uviéu

L'escritor Lluis Aique Iglesias Fernández y la obra Invisible resultaron ganadores de la décimoprimer edición del Premiu María Josefa Canellada de Lliteratura Infantil y Xuvenil en llingua asturiana, que concede la Conseyería d'Educación y Cultura. El xuráu encargáu de valorar les obres presentaes axuntóse esti martes, na Casa Conceyu de Cabranes, baxo la presidencia del director xeneral de Planificación Llingüística y Normalización, Fernando Padilla, y tuvo formáu pola escritora Berta Piñán, ganadora de la edición pasada; la escritora y especialista en lliteratura infantil y xuvenil Maite González Iglesias; la responsable de la Oficina de Normalización Llingüística de Xixón, María Xosé Rodríguez, l'asesora técnica del Serviciu de Planificación Llingüística y Normalización, Juncal García; l'alcalde de Cabranes, Gerardo Fabián, y el fíu de la escritora María Josefa Canellada, Alonso Zamora.

Ente les obres presentaes, el xuráu decidió conceder el premiu a la titulada Invisible, que se presentó col seudónimu Mon Llera Tardi, al reconocer nella «un tratamientu de temes d'actualidá con personaxes reales, con una bona estructura narrativa y un estilu lliterariu enllenu d'imáxenes simbóliques», según destaca l'acta. A esti gallardón, dotáu con 3.000 euros, podíen presentase obres de lliteratura infantil o xuvenil (noveles, compilaciones de cuentos, obres de teatru o poemarios) siempre que foren inédites y tuvieren una estensión mínima de 250 versos, nel casu de la poesía, y de 30 páxines a doble espaciu nos demás xéneros. Lluis Aique Iglesias Fernández nació en Sotrondio en 1967, ye llicenciáu en Filoloxía Inglesa pola Universidá d'Uviéu. Participó en dellos montaxes escénicos del Grupu de Teatru Universitariu de la Facultá de Filoloxía, ente ellos Lo que vio'l mayordomu, de Joe Orton, traducida pol propiu Lluis Aique en 1995.

Tien publicaos poemes y relatos en revistes como Lletres Asturianes y Lliteratura. Ta antologáu na muestra de nuevos narradores (1996). Ye ganador de diferentes premios lliterarios, ente ellos, el primer premiu del XIII Certamen de Cuentos Curtios Valentín Palacios (2018); segundu premiu del XX Concursu de Cuentos Pola Oficialidá del conceyu de Bimenes (2017) y Accésit Asturianu, XIII y XIV edición del Concursu de Rellatos Mineros Manuel Nevado, Madrid (2016 y 2017) También tradució del inglés al asturianu La importancia de ser Severu (Ediciones Trabe, 2002), de Oscar Wilde, y Lo que vio'l mayordomu (Academia de la Llingua Asturiana, 1995), del dramaturgu Joe Orton.

403 Forbidden

Forbidden

You don't have permission to access /votacion/pixel_votos_responsive.php on this server.


Apache/2.2.22 (Debian) Server at www.lavozdeasturias.es Port 80
Comentarios

Lluis Aique Iglesias gana'l Premiu María Josefa Canellada de Lliteratura Infantil y Xuvenil