La XDLA pide «altor de mires» na votación sobre la reforma del Estatutu pa recoyer la oficialidá
ASTURIAS
Pulgar diz que si se detacta una carencia de derechos «nun se pue retrasar» y que esti tema «nun pue sometese a los ritmos internos de los partíos»
21 nov 2018 . Actualizado a las 16:10 h.El portavoz de la Xunta pola Defensa de la Llingua Asturiana, Carlos Pulgar, pidió a tolos diputaos de la Xunta Xeneral «altor de mires y bon xacíu» de cara a apoyar esti vienres la propuesta de Podemos y IX p'abrir la reforma del Estatutu y incluir la oficialidá del asturianu y del gallego-asturianu.
Pulgar esplicó esti miércoles n'Uviéu que la votación supón un «fechu históricu» al ser la primer vez que s'intenta abrir la reforma ensin que sía a instancies del Conseyu de Gobiernu. «La primera vez que s'usa esti mecanismu y ye la pa la oficialidá, una llucha que lleva 40 años na cai», dixo.
Por eso, punxo en valir qu'agora los partíos recueyan «una demanda democrática d'un movimientu social» y pidió a tolos diputaos «altor de mires y bon xacíu» pa que salga alantre y poder incluir la oficialidá nel Estatutu.
La propuesta rexistróla Podemos Asturies y IX, que sumen 14 diputaos, pero necesita más diputaos pa salir alantre. Sicasí, el portavoz del grupu parllamentariu socialista, Marcelino Marcos, afirmó que se presentaron a les elecciones con un programa electoral que nun recoyía la oficialidá, polo que calificó a los proponentes d'actuar con «frivolidá» y de «namás buscar el debate».
Con too, sobre la posibilidá de que nun llegue aprobase, Carlos Pulgar indicó que nun se trata d'un fracasu «sinón d'un pasu alantre». «A lo llargo de décades les opciones de llevar la oficialidá a la Xunta Xeneral foron mui poques y agora al traviés de los mecanismos democráticos podemos facelo», afirmó, pa calificar el debate del vienres de «fechu históricu" al tratar d'abrir la reforma "p'atender una reivindicación popular».
Nesi sentíu, dixo qu'esti tema lleva cuarenta años na cai y «nun pue sometese a los asuntos y ritmos internos de los partíos», anque alvirtió qu'una vez que se detecta una carencia de derechos «esta nun se pue retrasar» y pidió que la propuesta cuente col votu a favor de tolos grupos.
«Interpretación restrictiva»
Per otru llau, Pulgar calificó d'interpretación «restrictiva» del reglamentu de la Xunta Xeneral qu'haya que votar l'apertura de la reforma y que nun s'entame 'de facto' una vez que los 14 diputaos rexistraron la iniciativa.
Nesi sentíu, afirmó qu'asina se «trata d'evitar los debates democráticos con escuses burocrátiques» y esplicó que mentes l'Estatutu fala de les posibilidaes p'abrir la reforma, el trámite parllamentariu pa iniciar esti procesu requier una votación previa.