El conseyeru d'Educación y Cultura nun quixo entrar a valorar les crítiques
28 nov 2018 . Actualizado a las 19:36 h.La Xunta pola Defensa de la Llingua Asturiana (XDLA) afirmó que l'anteproyectu de presupuestos pa 2019, pactáu ente PSOE, Podemos Asturies y IX, nun supón «nenguna meyora pal asturianu» y califiquen de «curtiu y mísere» que la partida de la promoción del asturianu quede nel 0,04% de toles cuentes. «La partida ye irrisoria y insuficiente, al ser la Dirección Xeneral de Planificación Llingüística y Normalización el departamentu con menos presupuestu de tola Administración autonómica», diz la XDLA al traviés de nota de prensa.
Pa l'asociación, esta situación muestra que nun hai cambios na FSA a pesar de lo aprobao nel so XXXII Congresu, onde'l partíu decidió apoyar la oficialidá. «Nin tenemos oficialidá nin muncho menos se cumple cola Llei d'Usu, que ye lo que dicíen los socialistes que diben facer hasta poder modificar l'Estatutu», indicó la XDLA, p'añadir que con esta «probitú» presupuestaria «nun se ven diferencies ente la FSA nueva y la vieya».
Serviciu asturianu de doblaxe
L'anteproyectu de presupuestos, na cantidá pa la promoción del asturianu, dedica una partida de 70.000 euros pa la promoción del asturianu en RTPA, dalgo que critiquen dende la XDLA porque l'Estatutu y la Llei d'Usu yá establecen que «los medios públicos tienen que ser una parte activa nel procesu de recuperación del patrimoniu llingüísticu del país». Por eso, la XDLA solicita a la Conseyería d'Educación y Cultura que firme un conveniu de collaboración cola TPA pa la creación del Serviciu Asturianu de Doblaxe, una entidá encargada de coordinar los doblaxes y supervisar los trabayos -de los que se van encargar empreses privaes-, amás d'avalar el modelu llingüísticu de los mesmos -que tien que cuidase con tol procuru-.
El conseyeru d'Educación y Cultura, Genaro Alonso
El conseyeru d'Educación y Cultura, Genaro Alonso, nun quixo entrar a valorar les crítiques de la Xunta pola Defensa de la Llingua Asturiana (XDLA) a la partida pa la promoción del asturianu recoyida nel anteproyectu de presupuestos, anque afirmó que-y parecíen «mui llexitimes». A preguntes de los medios esti miércoles n'Uviéu, el conseyeru nun quixo valorar los presupuestos, porque les cuentes d'Educación y Cultura van presentase'l 4 d'avientu próximu na Xunta Xeneral. La partida de la promoción del asturianu queda nel 0,04% de toles cuentes.
Alonso refugó falar de les crítiques de la XDLA nesi sentíu. L'asociación afirmó que, no que tien que ver col asturianu, l'anteproyectu pactáu ente PSOE, Podemos Asturies y IX, nun suponía «nenguna meyora pal asturianu» al ser «curtiu y mísere». «Parecen mui llexítimes les valoraciones que pueda facer la Xunta pola Defensa de la Llingua», indicó'l conseyeru d'Educación y Cultura.