Un exconseyeru de Fraga va defender esti sábadu'l modelu gallegu d'oficialidá como exemplu p'Asturies

L'ex conseyeru d'Educación y Cultura de la Xunta (1983-1986 y 1993-1996) y conseyeru de Rellaciones Institucionales y portavoz del Gobiernu de Manuel Fraga (1990-1993) Víctor Manuel Vázquez Portomeñe, va defender esti sábadu n'Uviéu'l desarrollu de la oficialidá en Galicia y como esti modelu sería aplicable p'Asturies.

Va ser nel II Seminariu «Oficialidá; el camín consitucional pal futuru del asturianu», que va inaugurar esti vienres a les 16.30 hores el rector de la Universidá d'Uviéu, Santiago García Granda, y qu'entama l'asociación Iniciativa pol Asturianu, según informó Europa Press.

Depués, l'ex presidente del Principáu Antonio Trevín (PSOE), la ex conseyera de Cultura Victoria Rodríguez Escudero (PP), l'ex conseyeru de Xusticia y Rellaciones Esteriores (IX); Francisco Javier García Valledor, y l'ex conceyal de Cultura d'Uviéu (PP) José Suárez Arias Cachero van participar nuna mesa redonda titulada «Oficialidá, una cuestión pendiente na autonomía asturiana».

El vienres tamién se va estrenar un documental tituladdo «El valir económicu d'una llingua» pa depués celebrar un debate ente empreses qu'utilicen l'asturianu na so actividá. La xornada va pesllala'l catedráticu de Derechu Alministrativu Leopoldo Tolivar Alas, que se va centrar na Constitución y el marcu de la oficialidá.

El sábadu van celebrase tamién delles meses a partir de les 10.00 hores, onde se va falar de los servicios de normalización municipales, un debate ente los principales sindicatos educativos --CCOO, UXT, Suatea y CSI--, y el papel de los medios de comunicación.

La xornada va acabar con una charla del ponente del Estatutu gallegu y ex conseyeru d'Educación y Cultura col PP Víctor Manuel Vázquez Portomeñe, sobre'l desarrollu de la oficialidá en Galicia y como esto sería aplicable p'Asturies.

Portomeñe foi tamién senador ente 1996 y 2008, foi impulsor del Añu Xacobeo y nel 2010 recibió la Medaya d'Oru de Galicia.

---

---