La Muyerada entama delles actividaes en Llano
25 sep 2019 . Actualizado a las 18:16 h.Quirós va ser el próximu sábadu l'escenariu de La Muyerada, un alcuentru de muyeres colos deportes de naturaleza como protagonistes. Les actividaes van tener llugar el día 28 en Llano, el pueblu del conceyu nel qu'hai una escuela d'escalada.
Oficialmente, el programa d'actos va empezar el vienres, cola apertura d'inscripciones y una proyección d'escalada. El gruesu de les actividaes va ser al otru día, y va haber talleres, actividaes, sorteos, espicha, proyecciones y música.
L'alcuentru presentóse'l pasáu llunes nun actu al qu'asistió la directora xeneral de Deporte, Beatriz Álvarez Mesa. Nun principiu la inscripción diba zarrase esi mesmu día pero entovía sigue abierta hasta que se completen les places. El so preciu ye de 20 euros.
Pueden participar homes y muyeres, anque los talleres deportivos son de presencia puramente femenina y l'ésitu de la edición del añu pasáu xenera bones espectatives pa la d'esti. L'oxetivu de La Muyerada ye dar visibilidá a la igualdá de xéneru al traviés del deporte