L'alministración reparte más de 360.000 euros ente 38 colectivos
03 nov 2019 . Actualizado a las 05:00 h.La consecución del principiu d'igualdá d'oportunidaes ente muyeres y homes nel ámbitu llaboral, l'atención directa a muyeres de colectivos especialmente vulnerables y el fomentu d'estos principios nel ámbitu educativu pal exerciciu 2019. Esos son los trés oxetivos fundamentales de la última convocatoria realizada pol Gobiernu asturianu pol que repartió 363.000 euros n'ayudes, ente 38 asociaciones de tolos ámbitos, dende sindicatos a ONGs, colectivos sociales, asociaciones feministes o educatives.
L'espediente empezó yá nel mes de xunu col antiguu Institutu Asturianu de la Muyer, güei tresformáu na Dirección Xeneral d'Igualdá, qu'asumió les sos competencies. La so xera inclúi la eliminación de cualesquier tipu de discriminación en tolos ámbitos y pa consiguilo sofítase tamién na sociedá civil y nel tercer sector.
El presupuestu de 363.000 euros repártese en trés llinies d'actuación. La exa qu'espertó más interés y que suma una mayor inversión ye la destinada a realizar programes d'empoderamientu na atención directa a muyeres de colectivos especialmente vulnerables. A esti fin dedíquense 251.000 euros. Un total de 18 colectivos tán trabayando nesta área coles ayudes. Trés d'ellos tán percima de los 16.000 euros. Son los qu'executen Aceem, con un plan pa muyeres inmigrantes denomáu Emprendiendo camino hacia la igualdad; unu de la la Fundación de Mujeres denomináu Entamar; y otru de la Fundación por la Acción Social Mar de Niebla, llamáu Empoderamiento en igualdad. Ente'l restu hai acciones psicosociales, dalgunos d'intervención col colectivu xitanu o tamién destinaos a les families monomarentales.
La exa formativa suma 72.000 euros. Amás de los sindicatos UXT, CCOO o CSIF apaez ente los beneficiarios el Colegio Oficial de Graduados Sociales de Asturias y distintes asociaciones feministes. El proyectu más subvencionáu ye precisamente'l de Fundación Mujeres, destináu al amenorgamientu de la fienda salarial nes empreses asturianes. Recibió cuasi 12.000 euros. Pela so parte, Asociación Empresa y Mujer (Asem) participa col programa Competitivas. Toma partido, pol que va recibir 12.000 euros. L'Asociación de mujeres de empresas de economía social (Amespa) va realizar un analís de les diferencies na elección d'estudios universitarios, basáu n'encuestes a les mesmes alumnes.
La tercer llinia ta, precisamente, centrada en llograr la igualdá nel ámbitu educativu. Once asociaciones recibieron ayudes. L'Asociación Gitana de Xixón va destinar 3.000 euros a potenciar les dinámiques de xéneru ente iguales. Hai proyectos venceyaos al deporte, de la Escuela de Ciclismo de Viella; de prevención de la esplotación sexual, de Médicos del Mundo; o Libres sin miedo, una campaña contra les agresiones y los malos tratos de Casvaym.