Ovidio Zapico: «Zarréu tuvo al gobiernu al borde de rompese. Fueron díes mui difíciles»

Ovidio Zapico, conseyeru d'Ordenación de Territoriu, Urbanismu, Vivienda y Derechos Ciudadanos, repasa l'actualidá d'Asturies nesta entrevista pa La Voz de Asturias.

—¿Cuálu ye’l balance del pautu de gobiernu col PSOE nel ecuador de la llexislatura?

—En IX somos críticos y inconformistes por naturaleza. Amás, dambes fuercies sabemos que tenemos de facer un esfuerzu pa entendernos, pero eso nun ta reñío cola esixencia y l’autocrítica. Tamos dándo-y estabilidá a Asturies, y esa ye la primer obligación d’una izquierda con madurez democrática. L’equilibriu ye positivu, pero hai amenaces series. El PSOE tien d’entender que les universidaes privaes o Quirón, les polítiques ambientales en manes de les empreses o’l déficit nos servicios sociales rocen el camín a la derecha y dañen a la clase trabayadora. N’Asturies volvió a facese política de vivienda dende va namás dos años. Hai qu’impulsar les polítiques d’identidá, pasar de lo simbólico a les realidaes materiales, ye´l momentu. 

—¿Qué tien que facer el Gobiernu d’Asturies col portalgu del Güerna?

—Lo que se ta faciendo: liderar la respuesta xurídica, política y social dende’l senu de la Alianza poles Infraestructures. Ye necesaria una movilización social; esto tien de ganase na cai y cola unidá. Nun ye momentu pa les divisiones. La única sigla que tenemos de sacar ye la d’Asturies; esta tien de ser una movilización de país. Los yoísmos políticos son frutu de la inseguridá y de la debilidá política. Asturies necesita fuercia unitaria. Ye una oportunidá pa amosanos como país. 

—¿Hubo tensiones, húboles recién pol accidente de la mina de Zarréu o pola fuelga de maestros?

—María Miranda, la secretaria d’Organización d’IX, díxolo cola claridá que yera necesaria nuna entrevista va unes selmanes: Zarréu tuvo al gobiernu al borde de rompese. Fueron díes mui difíciles. 

—¿Húboles, háiles entá por Costco, poles directrices de comerciu y la Llei de Proyectos Estratéxicos?

—Somos dos proyeutos políticos distintos, con dos propuestes distintes. Hai d’esixinos estabilidá p’Asturies, non una coincidencia plena en tolos asuntos. Un gobiernu de coalición d’izquierdes ensin tensiones nun esiste. Tien que les haber, y la madurez pa xestionales ye la clave. Tolos que vusté enumbera son proyeutos que reciben sofitu o presión empresarial; tenemos que facer por resistila. Nun mos gusta la Llei de Proyeutos Estratéxicos, pero tenemos tres diputaos y diputaes: esa ye la realidá que hai que camudar. Al tar dientro del gobiernu pudimos evitar una llei peor. Tar dientro del executivu xenera contradicciones, pero da utilidá; la inutilidá discursiva ye, como dicía Lenin, la enfermedá infantil de la izquierda.

—Ye conseyeru de Vivienda, un asuntu d’enorme preocupación social, especialmente pa la xente mozo. ¿Qué planes tienen a curtiu plazu?

—Cuatro cuestiones de manera inminente: aprobaremos el Proyeutu de Llei de la Vivienda pa que se debata na Xunta; remataremos la tramitación que va declarar 16 zones tensionaes n’Asturies; pondremos en marcha l’Alquilámoste (programa col que movilizaremos vivienda vacia); y por último, vamos llicitar otra remesa de vivienda pública destinada al alquiler asequible nun númberu non inferior a 400 pisos. Agora la vivienda ta como prioridá del Gobiernu; nun lo foi per munchos años. La Llei de Vivienda asitia los intereses xenerales perriba de los empresariales. Nun hai una crisis de constructores, sinón d’accesu a la vivienda de les persones. Esto cuesta que los empresarios lo asuman, y por eso’l PP presenta la so propia llei, que vamos combatir. 

—¿Ye un problema pa la vivienda n’Asturies los pisos turísticos?

—Ensin dulda. Nun ye l’únicu problema, pero sí ye un problema y non menor. Soi partidariu de poner tolos recursos p’acutar al máximo los pisos turísticos: si por min fuera, nun los habría. 

—Nun hai númberos pa la oficialidá nel Parlamentu. ¿Qué pue facese pol asturianu cola Llei d’Usu?

—Pautar col asturianismu social y políticu una fueya de ruta llegal. Tenemos una mayoría de país pa reformar la Llei o dotala de reglamentu; pa camudar la fecha del Día d’Asturies, pa separtala de la celebración relixosa (qu’hai que protexer como parte de la identidá colectiva, por cierto). Tenemos mayoría pa llexisllar sobre la RTPA, el RIDEA y l’Academia, que son instrumentos materiales pa siguir avanzando na promoción de les nuestres llingües y nel procesu d’autoconciencia. La mayoría háila. ¿Va aplicase? Presentamos les nuestres propuestes d’avance. Queremos una Llei d’Identidá na que l’Academia de la Llingua tenga más medios materiales y humanos; queremos que’l RIDEA se tresforme nuna Academia de les Artes y les Ciencies d’Asturies, abierta a los pensadores asturianos. Tenemos el llibru de David Guardado y les reflexones de Faustino Zapico como referencies pa trabayar en too esto: una idea d’Asturies que nun ye la que’l consensu conservador xeneró. La batalla nun ye namás defender l’asturianu, ye l’autoconciencia d’una Asturies que quier esistir, de facer país. 

—Hai xente dientro del asturianismu que vos reprocha nun aceptar les condiciones fiscales de Foro na pasada llexislatura. ¿Qué-yos diría?

—Que los derechos civiles nun se paguen con más privilexos económicos pa los ricos. El tiempu amosó qu’esos privilexos yeren lo único que-y importaba a Foro, güei un proyeutu escosáu que funciona como apéndiz del PP. Agora en prespectiva vemos que nunca hubo 27 votos pa una reforma estatutaria y que Foro taba buscando escuses pan un la apoyar. Asturies como país nun se constrúi recortando derechos sociales. La nuestra tierra conquistó derechos, y la identidá d’Asturies contién nel so corazón la nuestra dimensión social. El nuestru pueblu nun merecía perder recursos nin dar el mensaxe de que los ricos puen condicionar la construcción d’Asturies. Aceutar les rebaxes fiscales dañaba la identidá d’Asturies y la so construcción como país, amás de dir escontra los intereses de la clase trabayadora y los principios fundamentales de la izquierda d´una fiscalidá progresiva. Quién más tien, más tien qu’apurrir. 

—En Grau destacóse que se fixo poco pola memoria democrática. ¿Qué queda pendiente n’Asturies y qué va facer el Gobiernu al respeutu?

—Fíxose poco per munchos años dende les alministraciones y eso xeneró una delda coles víctimes del franquismu y coles sos families. Güei les alministraciones yá asumen responsabilidaes, dalgunes (como Grau) de manera exemplar dende va 10 años, convirtiéndose esti conceyu nun referente de les polítiques de memoria n’España. Y agora nel Gobiernu d’Asturies, creo que se nota l’impulsu que-y tamos dando a estes polítiques: desenterramientos, análisis d’ADN, reparación de les víctimes de la barbarie nazi, dixitalización de los procesos del archivu militar de Ferrol, construcción d’una alministración en materia de memoria… Queden temes pendientes que vamos abordar a lo llargo de la llexislatura, como favorecer la recuperación y conservación del patrimoniu bélicu, la declaración de llugares de memoria o la retirada y resignificación de simboloxía franquista. 

—¿Hai riesgu, como dixo Barbón, de que la ultraderecha entre nel Gobiernu d’Asturies?

—Nun fai falta que lo diga Barbón: ye una realidá. Tamos énte un paradigma que nun se daba dende’l franquismu y que se ve nun riesgu ciertu de que partíos facistes puean llegar al Gobiernu d’Asturies. Y énte esa amenaza, tola izquierda ta apellada: si nun somos audaces, vamos equivocanos. La izquierda tien de paecese a los sos votantes, a la so base social, a la sociedá. Güei pídennos unidá énte la involución democrática que se vive n’Europa y n’EEUU, compromisu con polítiques de tresformación. El PSOE tien d’entender que les polítiques conservadores (como dixe enantes) rocen el camín a la involución. Tenemos d’alcordar polítiques que desarrollen l’Estáu Social. La propuesta de la izquierda, cuanto más unitaria, meyor. Vox nun quier gobernar: quier avanzar escontra una sociedá totalitaria. Esi ye’l retu que tenemos, el nuevu paradigma al que debemos responder. Yo siempre voi impulsar polítiques d’alcuerdu. Alcuerdu, alcuerdu y alcuerdu. Esa ye la clave pa construyir izquierda. 

—Nel pasáu hubo amarraces con IU a nivel federal. ¿Cómo son les rellaciones agora y qué alíances deberíen texese a nivel estatal?

—Somos parte del corazón de la dirección federal. Antonio Maíllo ye la nuestra apuesta política ensin nengún xéneru de duldes: ye la persona que lidera IX y que pue liderar la propuesta progresista nel Estáu. IX federal ye la nuestra casa común, y IX d’Asturies nun se constrúi ensin IX federal. Al mesmu tiempu, equí formamos parte d’un proyectu compartíu que ye Convocatoria por Asturies, con Izquierda Asturiana y Sumar. Somos militantes d’un proyeutu organizáu en tol Estáu que defende les identidaes nacionales de los territorios y la identidá de clase. Afortunadamente pregunta por daqué yá mui alloñao nel tiempu, parte de la historia d’esta organización que va camín de los sos 40 años de vida. La izquierda tien de superar la manera na que se vien entendiendo la política dende 2014 y asumir la existencia d’esi nuevu paradigma al que fixi referencia na respuesta anterior. O reaccionamos con audacia o peligra la existencia del Estáu Social y Democráticu de Derechu talo como lu conocemos, porque l’amenaza nun ye solo p’Asturies, tamién lo ye pa España. 

—¿Ta faciendo lo suficiente Asturies por Palestina? ¿Qué pue facer una comunidá autónoma?

—Enxamás va ser suficiente mientres nun acabe esta situación na que la estraema derecha israelí convirtió’l xenocidiu sobre’l pueblu palestín nuna masacre televisada.

Tamos dando pasos na bona direición: la sociedá tomó conciencia y, dende los gobiernos apruébense midíes que van na bona llinia, pero hai veces que nun son abondes y el tiempu aperta. Güei los campos d’exterminiu nazis, que dexemos pa la memoria histórica, glayen que nun tien de volver a pasar… y ta pasando. Tán exterminando un pueblu. Otra vegada. La decencia moral obliganos.

---

---