Beatriz González Prieto: «El oxetivu de la llei de bebíes enerxétiques ye informar de los riesgos y fomentar bonos vezos de consumu»

Entrevista a la Viceconsejera de Derechos Ciudadanos del Principau d'Asturies, Beatriz González Prieto

—¿En qué consiste la llei de bebíes enerxétiques?

—Ye una llei pionera que regula midíes empobinaes a la protección de los menores de 16 años, al entendelos como consumidores vulnerables, yá que disponen d'una información sesgada y de parte, que-yos llega pela publicidá en xeneral y pelos influencers contrataos poles empreses del sector en particular.

—¿Cuálos son los oxetivos que se busquen?

—Les acciones que se contemplen xiren alredor de la prevención, la sensibilización y control. El finxu ye informar de los riesgos asociaos y fomentar bonos vezos de consumu na nuesa comunidá autónoma. Van dirixíes a menores, a les families, entidaes públiques, amás de los establecimientos comerciales.

—Ente otres midíes, van podese llendes a la venta. ¿Cómo se va a controlar nes máquines espendedores?

—Efectivamente la propuesta sorraya la prohibición de vendelo n'espacios onde tea prohibíu'l consumu y va ser d'obligáu cumplimientu disponer de sistemes efectivos de verificación d'edá qu'ayuden a cumplir la normativa, y a mayores en dellos casos, va llevar a cabu xuna supervisión directa pa evitar l'alquisición d'estos productos.

—¿Disponen datos de cuántes persones consumen davezu estes bebides n'Asturies? ¿Cuántos d'ellos son menores d'edá? 

—De mano, al traviés de distintos informes, estudios y encuestes somos conocedores del aumentu esponencial del consumu. Na encuesta ESTUDES n'estudiantes de 14 a 18 años del añu 2023 investigóse l'impactu d'estes bébores, los analises de los resultaos son concluyentes, casi la metá de los estudiantes (47,7%) consumióles nos postreros 30 díes y nun % non menor, entemecíu con alcohol y otres sustancies. 

—Esiste consensu ente la comunidá científica a la d'identificar los riesgos del consumu d'estos productos, pero hasta agora solo Asturies y Galicia decidieron regulalo. ¿Por qué motivos? 

—Nun voi falar de les decisiones d'otros, pero si sorrayo qu'ente los beneficios económicos d'unos pocos y la salú de munchos, el Gobiernu d'Asturies decantóse polo segundo. Per otru llau sabemos por estudios previos, que'l consumu de bébores enerxétiques entemecíes con alcohol en menores ye mayor na zona del norte d'España. N'Asturies tenemos una sociedá que yá ye bien consciente del consumu abusivu de los sos fíos y tamién de los sos efectos. Tuviemos un procesu d'escucha y verifiquemos que la comunidá educativa, la sanitaria, los axentes sociales y los representantes de la mocedá n'Asturies amosaron unanimidá en tala esmolición. 

—¿A qué sanciones esponen los qu'incumplan la llei?

—Ye xuna llei claramente preventiva, marcada pola sensibilización y nel consumu saludable y que nun tien fin recaldador, En menores que consuman estes bebíes les multes d'hasta 600 euros van poder sustituyise pola realización d'actividaes de calter educativu y pedagóxicu. Per otru llau la llei va ser garante yá que tamién recueye multes d'elevada cuantía, inclusive pieslle d'establecimientos a los vendedores o suministradores que faciliten a estos menores la so compra.

—¿Qué plazos remanen? ¿Cuándo envaloren que va entrar a valir? 

—La propuesta de llei va alzase al conseyu de gobiernu de manera inmediata, pa darréu llevar l'alderique y aprobación a la Xunta Xeneral del Principáu d'Asturies onde esperamos un consensu ampliu nesti apueste pola salú de la mocedá asturiana.

---

---