Artículu d'opinión de Miguel Fernandi
15 may 2018 . Actualizado a las 17:15 h.Yera casi domingu y ehí tábemos dos paisanos que yá peinamos canes comiendo una pizza, bebiendo una Heineken de lata (toles cerveces de lata saben a lata) y mirando pa la tele viendo como les votaciones d’Eurovisión nun acababen d’empezar. La verdá que nun tábemos pa muncha Eurovisión, lo único que queríemos yera cenar algo rápido y dir pal hotel pronto.
Esos yéremos la fin de selmana pasada’l mio amigu Chema y yo. A Chema seguro que lu conocéis, foi conseyeru del Real Oviedo seis meses y durante más tiempu ayalgueru de l’APARO. Nun-y queda demasiao pa llegar a los 50 años de carné oviedista y con él tengo fechos munchos kilómetros en coche pelos campos de Tercera y Segunda B.
Con Chema fui a Pamplona’l sábadu y Chema vivió’l partíu al mio llau na cabina. Coincidíemos los dos en que tábemos mui tranquilos, volvimos a coincidir en que nos punximos mui nerviosos col gol de Linares y les miraes nuestres na segunda metá yá vaticinaben que la cosa pintaba mal.
Depués de les ruedes de prensa, les entrevistes a los xugadores y recoyer los aparatos tocaba salir d’El Sadar pasaes les once de la nueche. Teníemos amigos con mesa reservada en Pamplona y cola intención de salir a mover la patuca, nosotros non. Nun planificáremos la cena nin pensáremos en tomar un cacharrín porque l’hotel teníemoslu fuera de la ciudá y el domingu tocaba llevantase pronto pa dir a Logroño a ver al equipu femenín.
«Chema, pon Telepizza Pamplona nel Google Maps» foi lo qu’acerté a dicí-y. Sólo queríemos matar la fame y dir a descansar unes hores. Demasiaes ilusiones nel primer tiempu y otra patada ente Candás y Lluanco na segunda metá.
N’aquella mesa de la empresa de comida rápida tuviemos la mesma conversación d’otres tantes veces… «Vaya oportunidá perdida», «si l’equipu taba bien», «yo creo que s’acabó», pero p’acabar, Chema -que ye la voz siempre sensata- dixo aquello de: «el martes volveremos a creer nel 9 de 9, nun tenemos solución».
Y yo nun digo que nun creo, que puede ser, pero ye martes pela mañana cuando escribo esto y sólo toi pensando en que l’equipu gane al Sevilla Atlético... polo que pueda pasar.
P.D. El domingu a les trés y picu de la tarde tocó l’hamburguesa de la derrota. Ehí tábemos nun aria de serviciu llorando les penes pola derrota del femenín y dándo-y opciones al colesterol de siguir amargándonos la vida. Por cierto, si’l sábadu hai que dir al Tartiere, el domingu hai que facer lo mesmo n’El Requexón coles muyeres. ¡Yá entamó la remontada!
