Artículu d'opinión de Miguel Fernandi
06 jun 2018 . Actualizado a las 13:45 h.Dicía Anquela esti día que-y prestaba que la prensa viéremos como se trabaya nel club, especialmente na dirección deportiva y la secretaría técnica. La verdá que nun m’importaría compartir un día de trabayu con Joaquín del Olmo y Ángel Martín González y enterame de tolo que tienen ente les manes.
Ye tiempu de nun equivocase, probablemente’l momentu más difícil pa un equipu. Depués de meses d’estudios, siguimientos y partíos vistos, agora toca rematar los fichaxes que lleven selmanes apalabraos y adelantase nel mercáu polos futbolistes qu’empiecen a desvinculase d’otros equipos. Probablemente nun habrá manera de pagar trespasos de nengún tipu. Fallarán algunes primeres opciones y habrá qu’arriesgar con segundes y terceres.
Será tiempu tamién de mirar bien con qué quedar, qué nun renovar y qué negociaciones hai qu’abrir y de qué manera pa que les rescisiones nun sían traumátiques no personal y no económico.
Pa la prensa tamién ye tiempu de nun equivocase y d’acertar lo más posible. A mí nunca me prestó ser una metralleta que saque 50 nomes en dos meses y que depués presuma d’acertar 8 y mirái que sería lo más fácil. Creo que lo pior que podemos facer ye aturullar y saber filtrar les informaciones que surden d’un y otru llau.
Desque’l sábadu a les 22:20 hores se-y acabó la vida competitiva al Real Oviedo la mio axenda de númberos de teléfonos medró de forma esponencial. Númberos de representantes y de futbolistes a los que llamar y tantiar. Siempre cola premisa de que’l que lo niega too puede ser un futurible y que’l que se dexa querer probablemente nun tenga más que’l querer propiu.
Tiempu de medir y contrastar les informaciones. Tiempu de tirar esa muria casi infranqueable que ye’l Real Oviedo p’adivinar les sos intenciones.
