Hungría n'Europa ye'l casu que más rescampla de la deriva totalitaria d'estos tiempos. Énte les crisis econónima y sanitaria, qu'habríen fomentar la solidaridá, surden movimientos antidemocráticos como'l del gobiernu húngaru. Budapest ye una postal guapa ensin ánima.

Como n'otros llugares, la sida de la inmigración y la supuesta inxerencia de la X.E. na vida política estatal, ficieron una falsa conciencia defensiva nun país del este; treslladáu na práutica dende'l comunismu a la dictadura de dreches. Lo peor ye qu'Hungría ye un estáu miembru de la X.E. Esta Europa de los drechos civiles y la llibertá d'espresión, per aciu de la xunión de los sos integrantes. Pero que nun sabe cómo retrucar a los conflictos.

El pautu de la vergoña con Turquía, la falta d'autoridá ente les zunes de dellos estaos y l'ausencia d'un braeru espíritu de xuntanza cívica paneuropea tán llastrándola al debalu poles fuercies económiques tresnacionales y los ultranacionalismos escluyentes. El Brexit foi la primer piedra nel camín. Agora Hungría lidera la ultradrecha nel continente, pero dende un gobiernu estatal. Víktor Orbán ye'l representante del facismu de nuevu alcuñu nel sieglu XXI. Toa esta fola, ye ñidio, que vien alendada poles polítiques de los EE.XX. dirixíes por Donald Trump.

Más Europa sí, pero una meyor Europa pa toles persones que l'habiten, pue ser un bona conseña pa la so sobrevivivencia nel futuru como un polu con puxu y voz internacional basáu na cultura, la pluralidá y la defensa de los Drechos Humanos. Esi ye'l desafíu que cinca les llinies qu'esti continente tien de plumiar urxentemente.

Xuníos na Diversidá, ensin estremancies ente les coordenaes Norte-Sur o Este-Oeste, vamos afuntar con mayor determín y serenidá pente la incertidume de los munchos cambeos que plantega'l esti sieglu XXI.

Si nun ye asina, entós ¿cuála ye l'alternativa que pue aportar?

Comentarios

¿Allóñase Hungría d'Europa?