En marzu anuncióse’l referéndum pa continuar al procesu d’integración d’Islandia na XE pal 29 d’agostu. Islandia dexó tres cuatro años les negociaciones de xuntura nel 2013. Fai parte del espaciu Schengen, del Espaciu Económicu Européu (EEE) y de l’Asociación de Llibre Comerciu Europea (EFTA).
Con unos 366.000 habitantes y un Índiz de Desendolcu Humanu (IDH) mui altu,ye una islla na qu’hebo’l primer asentamientu viquingu nel 874. Tien el Parllamentu más antiguu del mundiu l’Althing. Perteneció a Noruega y llueu a Dinamarca. De la qu’algamó la so dixebra nel añu 1918, confirmada como república nel 1944. Magar que caltuvo’l modelu social nórdicu.
L’islandés ye l’idioma oficial, rellacionáu col nórdicu antiguu (escandinavu de la dómina viquinga de fai 1.000 años. D’esta miente un islandés d’anguaño pue lleer les sagues del sieglu XIII. Ta rellacionada col feroés y el noruegu occidental. Ye conservadora al nun importar pallabres pa nuevos conceutos sinón creyales dende les esistentes n’islandés o dándo-yos un significáu modernu.
El llabor normativu d’alcuñar nueves pallabres failo un departamentu de la Universidá d’Islandia, asitiáu na capital del país, Reikiavik. El Departamentu de Planificación Llingüística dependiente del Ministeriu de Cultura encárgase de la preservación y estandarización y asesoramientu del idioma islandés.
El referéndum dio como favoratibles el 47,2% de los votos y el refugu del 52,8 % colo que la situación queda igual qu’hasta agora. A lo menos demientres los dos vinientes años. El sí abriríe’l pasu a un segundu referéndum sobre la integración como miembru de la XE.
Pesie al aplazamientu dafechu de la negociación d’ingresu na XE, Islandia sabe que tien les puertes abiertes a un futuru común más averáu entá. Y qu’esbrexará un camín que bien podíen siguir Noruega, Suiza y Liechtenstein, qu’asitiaos como la islla nórdica, caltienen los estándares europeos anque nun tean entá na XE.