Un sellu de Correos pa homenaxar a Margarita Salas

G. G. REDACCION

AGORA

sello Margarita Salas

La bioquímica asturiana entra a formar parte de la serie Muyeres na Ciencia con una tirada de 160.000 exemplares

16 jul 2021 . Actualizado a las 17:28 h.

La bioquímica asturiana Margarita Sales yá forma parte de la serie Muyeres na Ciencia cola que Correos rinde homenaxe a investigadores y científiques. Con una tirada de 160.000 exemplares y un valor postal de 1,50 euros, el sellu dedicáu a Margarita Salas puede adquirise nes oficines de Correos, contactando col Serviciu Filatélicu, nel corréu electrónicu atcliente.filatelia@correos.com o nel teléfonu 915 197 197.

El sellu de Salas, «una de les mayores científiques españoles del sieglu XX», foi presentáu esti vienres nel Hospital 12 d'Ochobre pol presidente de Correos, Juan Manuel Serrano Quintana; la directora xerente del centru hospitalariu, Carmen Martínez de Pancorbo González; el profesor Jesús Ávila De Grado, ún de los primeros discípulos que se formaron nel llaboratoriu de Margarita Salas; la fía de Margarita Salas, Lucía Viñuela Salas, y la directora xeneral d'Investigación, Docencia y Documentación de la Conseyería de Sanidá de la Comunidá de Madrid, Teresa Chavarría Jiménez.

Margarita Salas nació en 1938 en Caneiru (Asturies) y doctoróse en bioquímica en 1963 pola Universidá Complutense de Madrid. Darréu desenvolvió'l so llabor d'investigación mientres trés años col Premiu Nobel de bioquímica Severo Ochoa, na Universidá de Nueva York. Más tarde, en 1967, volvió a España y fundó'l primer grupu d'investigación en xenética molecular del país nel Centru d'Investigaciones Biolóxiques del CSIC, en Madrid, onde trabayó hasta l'añu 1977.

Ún de los principales llogros de la so carrera, según recuerden en Correos, foi'l descubrimientu de que'l virus Phi29 tenía una enzima, la Phi29 ADN polimerasa, qu'ensambraba molécules d'ADN muncho más rápido y con muncha más precisión. Salas aislló la enzima y demostró que funcionaba nes célules humanes, marcando l'empiezu d'aplicaciones anovadores pa les pruebes d'ADN. Esta técnica úsasw en medicina forense, oncoloxía y arqueoloxía y foi amás la patente más rentable del Conseyu Superior d'Investigaciones Científiques (CSIC).

Margarita Salas, añaden dende Correos, siempres reivindicó'l valor de la busca de conocencia. «Lo importante ye facer investigación básica calidable, y d'esta pueden salir resultaos aplicables que nun son previsibles a primer vista. Y sicasí salen y pueden ser rentables», afirmaba la científica asturiana que, a lo llargo de la so carrera, recibió numberosos premios internacionales y nacionales, ente los que s'atopen la Medaya Mendel, el Premiu Rey Jaime I, el Premiu Nacional Ramón y Cajal, el Premiu L’Oreal UNESCO y la Medaya Echegaray.

Tamién dexó un ricu y estensu legáu compuestu por más de 350 publicaciones en llibros y revistes nacionales ya internacionales, llogró ocho patentes y foi la primer muyer n'ingresar na Real Academia de Ciencies Exactes Físiques y Naturales, en presidir l'Institutu d'España, en llegar a l'Academia Nacional de Ciencies d'Estaos Xuníos y n'incorporase a la Real Academia Española, onde ocupó'l sillón i.