Una investigación con participación de la Universidá d'Uviéu llogra nanoestructuras 3D magnétiques

La Voz REDACCION

AGORA

Aurelio Hierro-Rodríguez, investigador del departamento de Física de la Universidad de Oviedo
Aurelio Hierro-Rodríguez, investigador del departamento de Física de la Universidad de Oviedo

El descubrimientu abre-y el camín a nueves aplicaciones en computación cuántica, en microscopía a la nanoescala y na creación de materiales intelixentes avanzaos

21 dic 2021 . Actualizado a las 13:03 h.

Un equipu internacional d'investigadores, nel que participó la Universidá d'Uviéu, llogró per primer vegada nanoestructures 3D magnétiques con estaos topolóxicos complexos que se propaguen al campo esterno qu'estes xeneren. Esti afayu abre-y el camín a nueves aplicaciones en computación cuántica, en microscopía a la nanoescala y na creación de materiales intelixentes avanzaos. Los resultáos llograos foron espublizaos na prestixosa revista Nature Nanotechnology, de máximu impactu na so área de la conocencia.

L'usu de técniques d'impresión 3D pa’l desendolcamientu de prototipos constituyó una gran meyora en ciencia y la inxeniería debíu la so versatilidad y a la so capacidá pa fabricar pieces y xeometríes imposibles de crear mediante otros métodos de fabricación.

Nesti trabayu, lideráu polos investigadores Amalio Fernandez-Pacheco, del Institutu de Nanociencia y Materiales d'Aragón, INMA, institutu mistu del CSIC y l'Universidá de Zaragoza, y Claire Donnelly, de la Universidá de Cambridge, Reinu Uníu; l'empléu de técniques avanzaes de nanoimpresión 3D basaes en microscopios electrónicos dexó crear una estructura de doble hélice magnética d'unes poques decenes de nanómetros de tamañu (1 metro contien 1.000 millones de nanómetros). Darréu, dicha estructura foi investigada por aciu nano-tomografía de Rayos X nun sincrotrón, una gran infraestructura científica que dexa faer imaxes de materiales con resolvimientu nanométrica.

L'investigador Amalio Fernández-Pacheco destaca que «gracies a les imaxes llograes en 3D del estáu magnéticu de la estructura, pudimos reparar que la so xeometría (bien asemeyada a la doble hélice del ADN) da llugar a estaos magnéticos que nos dexen controlar a voluntá'l campu magnético que se desendolca nel espaciu formáu ente les hebras de la doble hélice».

Esti estudiu, nel que tuvo un papel clave Aurelio Hierro-Rodríguez, miembru del departamentu de Física de la Universidá d'Uviéu, ye una contribución bien importante nel campu del Nanomagnetismo 3D, con gran interés pa’l desendolcamientu de dispositivos d'almacenamientu magnéticu y procesamientu d'información, que ruempe col paradigma actual basáu n'arquitectures 2D. L'investigador de la Universidá d'Uviéu esplica que «el saltu cualitativu de dos a trés dimensiones espaciales tien efectos non solo na densidá d'información que puede ser almacenada, sinón que la mesma física y fenomenoloxía de los sistemes magnéticos camuda y dexa abrir un abanicu de nueves posibilidaes pa esploraes y esplotaes».

En concretu, los resultaos del trabayu, que consiguió configurar el campu magnético local na nanoescala, dexaron la creación de testures con implicaciones en técniques d'imaxe, sistemes de confinamientu magnéticu y nel desenvolvimientu de nuevos materiales funcionales.

El trabayu foi desendolcau a traviés d'una collaboración internacional na que participaron, amás de la Universidá d'Uviéu, investigadores del Institutu de Nanociencia y Materiales d'Aragón (INMA), de les Universidaes de Cambridge y Glasgow (Reinu Uníu), de La Universidá de Viena (Austria), del Institutu Max Plank en Dresde (Alemaña) y del Institutu Swiss Light Source (Suiza). El proyeutu recibió financiamientu del Conseyu Européu d'Investigación (ERC) sol Programa d'investigación ya innovación Horizonte 2020 de la Unión Europea.