El Principáu peracaba la prueba p'acreitar el manexu de la llingua acordies col marcu européu de referencia
02 oct 2019 . Actualizado a las 05:00 h.El Principáu peracaba la prueba de certificación de conocencia del asturianu acordies colos niveles reconocíos pol Marcu Común Européu de Referencia de les Llingües. En creando la normativa llegal y afitando tolos plazos, llegó la vez d'afitar los precios públicos, el dineru que va tener qu'abonar pa inscribise.
L'Alministración asturiana decidió crear una tarifa única pa tolos niveles, tanto'l básicu como'l mediu y l'avanzáu. Esa cantidá ye de 31,63 euros. Esi preciu coincide coles establecíes nes escueles oficiales d'idiomes del Principáu pa la certificación d'otros idiomes estranxeros nel añu 2019
Esos 31,63 euros ye un preciu muncho más baxu del que rixe en organismos privaos pa otros idiomes. Asina, los exámenes de Cambridge pal inglés van dende los 63 euros del A1 hasta los 210 euros del C1 o Advance. Nesti casu, los niveles más altos son más caros. Lo mesmo asocede col títulu DELF pal francés. Nes tarifes del añu 2019, l'A1 cuesta 77 euros y el C1 205 euros. El restu de les certificaciones muévese ente dambos estremos.
El decretu que yá sometieron a esposición pública les Conseyeríes de Facienda y de Cultura, Política Llingüística y Turismu señala qu'esti preciu públicu va esixise per adelantao, enantes de la inscripción oficial nes pruebes de certificación. La falta del abonu va implicar la denegación de la inscripción.
La normativa ellaboróse de manera tala que nun se cree nin más burocracia nin tampoco un recargu económicu. En concretu, el testu señala que «n'aplicación del principiu d'eficiencia, la norma evita cargues alministratives innecesaries o accesories, racionalizando na so aplicación la xestión de los recursos públicos». El procedimientu llegal establez que se va aprobar per aciu d'un decretu del conseyu de Gobiernu.
Qué había hasta agora
Hasta agora, la única certificación de dominiu del asturianu ye la qu'expede l'Academia de la Llingua Asturiana (ALLA). «Consciente del fondu interés de munches persones por llograr que se reconoza la so conocencia de la llingua y pa manifestar asina l'amor al idioma asturianu, van faese dos convocatories al añu nos que va poder evaluase eses conocencies», esplica esti organismu na so páxina web. La postrera tuvo llugar el pasáu 25 de mayu. El preciu de les tases pa poder presentase ta afitáu en 12 euros y consta de dos partes, oral y escrita.
