La XDLA acusa a Javier Fernández d'usar «l'argumentariu ultraconservador» contra l'asturianu

Europa Press REDACCION

ASTURIAS

El presidente asturiano Javier Fernández, en el foro de Nueva Econonomía
El presidente asturiano Javier Fernández, en el foro de Nueva Econonomía

Comparen les crítiques del presidente a las que se fixeron «contra derechos como'l divorciu, l'albuertu o la igualdá del colectivu LGTB»

24 ene 2018 . Actualizado a las 16:54 h.

L'asociación Xunta pola Defensa de la Llingua Asturiana (XDLA)afirmó, en referencia a les palabres del presidente Javier Fernández, que nun se pue entender cómo una persona que se diz progresista ve los derechos cuidadanos como una amenaza, «como fixeron y siguen faciendo los sectores ultraconservadores contra derechos como'l divorciu, l'albuertu o la igualdá del colectivu LGTB».

Nun actu en Madrid esti martes, Javier Fernández dixo qu'había «xente enfotao» en rellanzar l'elementu d'identidá, dalgo que califició como un «riesgu», amás d'afirmar qu'ensin llingua «nun hai nacionalismos». «Nun sabemos si'l presidente ye partidariu d'un procesu d'etnocidiu llingüísticu y d'eliminar los horros, l'arte asturianu, Cuadonga, el paisaxe o la gastronomía pa que'l territoriu quede llibre de cualquier posible peligru identitariu», indicó la organización.

La XDLA señala que parez que'l xefe del Executivu autonómicu «descubre l'océanu» al dicir que les llingües son elementos d'identidá. Asina, pregúntense si'l presidente nun tien identidá, si namás val la de so y la de los demás sobra, «porque nun merez la mesma consideración en derechos».

La organización considera que Javier Fernández ta usando'l mesmu argumentariu «que los sectores ultraconservadores del Estáu» que se sienten «amenazaos» poles polítiques que busquen «la igualdá d'homes y muyeres o d'heterosexuales y gais». «Con declaraciones como les de Javier Fernández vese que les idees progresistes quéden-y mui lloñe», afirma la XDLA.

Amás, señalen que con palabres asina'l xefe del Executivu ta más cerca de les posiciones del partíu del PP de Mercedes Fernández, «que, col aplausu d'una minoria ultraconservadora y intolerante, nagua por arrampuñar unos pocos votos a la ultraderecha». Por eso, afirmen qu'un discursu asina ye propio de «époques predemocrátiques», onde namás se podía usar el castellanu.

«La falta de derechos ciudadanos pa una parte de la población d'Asturies ye un problema al que cualquiera que se llame demócrata tien que poner solución namás que se dea la posibilidá», afirmaron, pa señalar que nesta llexislatura «ye'l momentu» pa presentar una propuesta de reforma del Estatutu d'Autonomía pa incluir la oficialidá d'asturianu y gallego-asturianu.

«Los derechos nun s'aplacen y nengún demócrata pue aplazar el reconocimientu d'un derechu básicu como ye'l de la igualdá xurídica de les llingües propies d'Asturies», sentenció la XDLA, nuna clara referencia a la postura de la FSA d'Adrián Barbón d'aplazar el debate pa la llexislatura próxima.