Artículu d'opinión de Miguel Fernandi
10 ene 2018 . Actualizado a las 18:05 h.Creo que vi dos combates de boxéu enteros na mio vida. Aquel que vio tol mundu, o tol mundu diz que vio, de Poli Díaz contra Pernell Whitaker nel veranu del 91 y unu d’Aitor Nieto va un par d’años en Francia gracies a que consiguí topar una señal per internet y qu’acabó perdiendo’l nuestru boxeador.
Ye dicir, de boxéu se mui poco pero les películes de Rocky Balboa seles de memoria. ¿Contradicción? Nun se, quiciás tenga que ver que’l tresfondu de munches d’elles existan otros factores más importantes que’l deporte del cuadriláteru.
Sirva esta introducción tan poco trescendente pa facer una comparanza ente l’Oviedo y el personaxe de Sylvester Stallone. Si ye verdá qu’hubo unes selmanes onde los golpes al equipu d’Anquela asemeyaben a aquel d’Iván Drago a Apollo Creed que resultó mortal, pero agora l’equipu carbayón representa l’espíritu d’aquellos combates de Rocky.
Al Oviedo pueden pegá-y tolos golpes que quieran y de toles maneres. Puede fallar un penalti (o paralu’l porteru) a los catorce minutos y puede regalar un gol a la media hora en Huesca... Puede quedar con diez al empezar un partíu en Sevilla… Incluso nun futuru cercanu puede sufrir un arbitraxe de Pérez Pallas… L’Oviedo aguanta los golpes, puede inclusive caer al suelu, pero siempre va a llevantase. «Nun hai dolor» dícense a si mesmos los futbolistes que, cuando necesiten un gabitu, nin siquier tienen que llamar a «Adrian» porque «Adrian» yá son miles que van vestíos d’azul a les grades de los campos de fútbol onde xueguen.
L’Oviedo acaba la primer vuelta na tercer posición. Anque lo meyor ye que l’equipu acaba la primer vuelta siendo un equipu, un equipu con identidá, un equipu que compite, un equipu col que dir a la guerra siempre. Pese a eso, Anquela yá lo dexó claro na sala de prensa d’El Alcoraz cuando-y preguntaron qué balance facía depués de 21 partíos: «Que quedan otros 21». Rocky, na so última entrega llamada Creed, dixo aquello de «Paso a paso, golpe a golpe, asalto a asalto». Pues lo mesmo: lo primero Vallecas, depués yá se verá.
