Artículu d'opinión de Miguel Fernandi
24 ene 2018 . Actualizado a las 22:50 h.Diz el mio amigu y collaborador de Tiempo Añadido Nacio González qu’Anquela ye tan buenu como entrenador como preparando les ruedes de prensa. Mirái que coincido con Nacio en munches coses pero nesta non.
Nun creo qu’Anquela lleve los discursos programaos cuando fala colos medios, anque ye entendible que colos años que lleva na profesión y delantre de los micrófonos tenga la suficiente capacidá pa saber ‘manexase’.
Asistir a una comparecencia del entrenador del Real Oviedo ye una caxa de sospreses anque vamos atopando ciertos vezos y costumes. A les primeres preguntes contesta con tranquilidá, con respuestes curties y ensin ‘pisar charcos’. Pero siempre, siempre, hai dalguna entruga que lo fae enseñar al Anquela de verdá, l’Anquela de les comparaciones, los exemplos gráficos y les frases pa enmarcar. L’Anquela de los exemplos de la güela, de los ex-futbolistes que tuvo y de les sos esperiencies personales.
Anquela nun escuende si la pregunta ye facilona: «Es evidente» suel contestar. Anquela nun escuende si hai daqué que nun-y gustó anque fuese más lo positivo: sólo basta mirar lo que dixo al acabar el partíu de Vallecas.
Anquela nun ye d’alabances fáciles o sinón que-y lo pregunten a ‘los buenos’. ¿Cuántos palos lleva daos a Saúl Berjón y a Aarón Ñíguez y cuántes alabances? Porque Anquela nun ye de regalar palabres guapes a nun ser que se merezan. «Si eres bueno corre, si eres menos bueno corre el doble...» yá ta nel Top 5 de les frases de la temporada.
Dalgún me dixo que l’entrenador quixo meter al públicu en bolsu dende’l primer día a lo tribunero. Home, sería de fatos nun facelo, pero creo que tenemos claro que foi’l públicu’l que metió al míster en bolsu. Ver a una persona de 60 años cola so esperiencia emocionase nel entrenamientu a puertes abiertes previu al derbi a mi paecióme un xestu d’humildá y de tar nel sitiu onde siempre quiso tar.
Y lo más importante, ye un home al que nun-y valen les escuses. La siempre tan falada presión del Tartiere… ¿Presión? Anquela suaña con un Tartiere enllenu y quéda-y bien poco pa velo. Disfrutarálo él y disfrutarálo la xente. Y como suel acabar les frases él «...y nada más».
