¿Por qué ye tan difícil dir de Xixón a Avilés o a La Pola (Siero) en tren?
Son la tercer y la cuarta población del país. Y los tresbordos y la falta puntualidá faenlo una misión de riesgu, si daquién quier aportar a tiempu. Y eso qu’en coche tán a media hora más o menos...
Casu aparte son los nuevos trenes que nun caben pelos túneles, los accidentes, los cortes de víes por fueos, les averíes, los frecuentes retrasos, les comunicaciones telefóniques cortaes nes paraes ensin xente, la falta lluz pela nueche nes paraes y de megafonía p’anunciales, etc.
¿Y los venti años d’execución y el deceniu de retrasu na Variante’l Payares? ¿Y el marafundiu del proyeutu de Metrotrén en Xixón?
Anuncien la llegada del AVE a tierra asturiana, como’l gran llogru del sieglu XXI, cuando los trenes de Cercaníes, los más usaos polos asturianos son un caos. El tren de velocidá alta amás supón triplicar una invasión turística que yá entamó poles condiciones climátiques más favoratibles que les estremes del restu la Península Ibérica, fundamentalmente.
Los que van ente Xixón, la ciudá más poblada a Uviéu, la capital, y viceversa, munches vegaes van apinaos de xente y ye imposible sentase.
¿Por qué nun igüen esi problema crónicu con más trenes o más vagones?
Too ye un misteriu. ¿Hai daquién detrás de les males conexones ferroviaries asturianes? ¿Por qué tarden tanto los trayeutos a les llendes oriental y occidental?
Dempués falen los representantes públicos del fomentu del tresporte públicu, cuando nun faen por iguar un trazáu y un furrulamientu correutos pa les Cercaníes de RENFE y FEVE. Nin siquier s’algama qu’Adif y RENFE respeten la toponimia asturiana.
Asturies ye un país pequeñu, qu’entá nun ta bien comunicáu nin per carretera, anque ye más fácil el desplazamientu per esi mediu.
Ello nel centru d’Asturies, porque nes nales la cosa ye más abegosa. Cuasi too tiene que pasar per Uviéu, nuna clas de centralismu políticu y xeográficu de llibru.
Toles redes arreyaes a les poblaciones alloñaes del centru, como los hospitales, institutos, etc. carecen en munchos casos de dificultaes al so accesu por parte de los ciudadanos de los pueblos de les fasteres afeutaes. Sobre manera pa la población de mayor edá, que munches vegaes y en munchos llugares nun-yos queda otra que garrar un taxi. Tamién el tren ye un mediu más afayadizu porque permite llevar bicis, perros, patinetes, etc.
Una bona rede de ferrocarriles modernos, con bon furrulamientu, más recursos humanos nos equipamientos ya indicaciones nidies, faeríen un gran serviciu públicu. Ye’l tresporte menos contaminante y ecolóxicu, el qu’emite menos carbonu. Facilita la vida de cotidián pa los munchos ciudadanos que nun puen desplazase per medios privaos d’un mou continuu. Sedría meyor enfotase na población residente que nel turismu estacional y xenerador de xentrificación y masificación nun territoriu que nun ta preparáu pa esa nueva situación.