Reconoz el talentu de los chefs y la calidá de los 42 restoranes incluyíos na guía de la comunidá
28 jun 2022 . Actualizado a las 10:09 h.La web de la Guía Michelin promociona na so páxina web trés vídeos d'otres tantes rutes gastronómiques realizaes nel Principáu en collaboración con «Asturies Cocina de Paisaxe» coles mires de poner en valor la gastronomía y el productu de la comunidá autónoma, reconociendo'l llabor de los sos chefs, el recetariu y l'orixe.
La Guía Michelin recuerda que'l pasáu mes de mayu, al pie d'esti eventu gastronómicu de Turismu Asturies, ellaboró estes trés rutes qu'afayen la personalidá culinaria del Principáu.
Na web, amás d'un artículu editorial, yá tán disponibles los trés vídeos de cada ruta, unu dedicáu a la gastronomía, otru al productu y un terceru al paisaxe.
Con esti tipu d'iniciatives, la guía reconoz el talentu de los chefs y la calidá de los 42 restoranes incluyíos na guía de la rexón, ocho d'ellos distinguíos con estrelles Michelin, que s'inclúin na selección 2022.
Selmanes dempués de la realización d'estes rutes, estrénase'l tráiler y los vídeos na web y nes redes sociales d'esta guía culinaria nun trabayu audiovisual nel que s'amuesen los paisaxes, platos y hestories vivíes en caúna de les rutes, al pie de los chefs protagonistes.
En cada ruta, un chef embaxador de Cocina de Paisaxe actuó como anfitrión y convidó a un chef d'otra comunidá a facer xuntos un viaxe gastronómicu nel que se probó la mesma propuesta del anfitrión, visitóse a pequeños productores y percorriéronse dalgunos de les meyores paraxes naturales asturianos, según otres propuestes gastronómiques interesantes que daben sentíu al conxuntu de la ruta.